Сагсан бөмбөгийн 3х3-ын олимпын оноо цуглуулах шинэ циклийн тэмцээн эхэллээ.
Дэлхийн хамгийн өндөр зэрэглэлийн эхний тэмцээн Ченгдугийн “Их дуулга”-д шилдэг 12 баг өрсөлдсөнөөс Сербийн “ҮБ” баг аваргаар тодорч, тэдэнтэй нутаг нэгт “Лиман” мөнгөн медалийн эзэн болов. Тэгвэл манай улсын “Улаанбаатар Энержи” гуравдугаар байрт шалгарч 22 мянган ам.доллар халаасласнаас гадна дэлхийн цувралын 70 оноо авлаа.
“Улаанбаатар Энержи”-гийнхэн хэсгийн эхний тоглолтод АНУ-ын “Майами”-г 21:20-оор хожсон ч дараа нь Японы “Шинагава”-д 21:17-гоор хожигдсон. Улмаар хэсгээсээ хоёрдугаар байраар хасагдах шатанд шалгарч, Бельгийн “Антверп”-ийг 21:19-өөр хожсоноор хагас шигшээд үлдсэн юм. Гэвч энэ шатанд Сербийн “ҮБ” багт 21:16-гаар хожигдсоноор гуравдугаар байрт шалгарлаа.
Тэд одоо энэ сарын 7, 8-нд Филиппиний Манила хотод болох дэлхийн гранприд оролцоно. Тус тэмцээний эхний гурван байр эзэлсэн баг Австрийн Вена хотод болох дэлхийн цувралын эрх авах аж.
СЭТГЭГДЭЛ БИЧИХ