АНУ-ын Ерөнхийлөгч Дональд Трамп дэлхийн бүх улсаас орж ирэх бараанд ногдуулах тарифын хэмжээг 15 хувь хүртэл нэмэгдүүлэхээ мэдэгдлээ. Энэ нь өмнө нь түүний тогтоосон импортын татварыг хүчингүй болгосон Дээд шүүхийн шийдвэрийн дараах алхам болж байна.
Тэрбээр баасан гарагт мэдэгдэхдээ шүүхээр цуцлагдсан тарифын оронд АНУ-д орж ирэх бүх бараанд 10 хувийн татвар ногдуулна гэсэн юм. Харин бямба гарагт өөрийн сүлжээнд нийтэлсэн мэдэгдэлдээ уг татварыг одоогоор хэзээ ч ашиглаж байгаагүй худалдааны хуулийн хүрээнд зөвшөөрөгдөх дээд хэмжээ буюу 15 хувь болгохоор шийдвэрлэснээ зарлав.
Энэхүү шийдвэр нь Их Британи, Австрали зэрэг АНУ-тай 10 хувийн тарифын хэлэлцээр байгуулсан орнуудад тодорхойгүй байдал үүсгэж байна.
Мөн Трамп тарифыг худалдааны алдагдлыг бууруулах шаардлагатай гэж тайлбарласан ч АНУ-ын худалдааны алдагдал энэ долоо хоногт дахин өсөж, 2024 онтой харьцуулахад 2.1 хувиар нэмэгдэн 1.2 их наяд ам.долларт хүрсэн байна.
Тодруулбал, ихэнх бараанд 15 хувийн тариф ногдуулах ч стратегийн ач холбогдолтой ашигт малтмал, металл, эмийн бүтээгдэхүүн зэрэг зарим нэр төрлийн барааг чөлөөлнө. Үүний зэрэгцээ ган, хөнгөн цагаан, мод, автомашины эд анги зэрэг салбарт өмнө нь өөр хуулиар тогтоосон тусгай тарифууд хэвээр үлдэнэ.
Ийнхүү АНУ-ын Дээд шүүхийн шийдвэрийн дараах нөхцөл байдал тарифын шинэ бодлого дэлхийн худалдаанд тодорхойгүй байдал, улс төрийн маргаан, эдийн засгийн эрсдэлийг зэрэгцүүлэн авчирч байна.
СЭТГЭГДЭЛ БИЧИХ