Европын Төв банк (ЕТБ) еврогийн мөнгөн дэвсгэртийн дизайныг шинэчлэх ажилдаа албан ёсоор орлоо. Энэхүү валютыг 2002 оны нэгдүгээр сарын 1-нд гүйлгээнд гаргаснаас хойш гадаад төрхийг нь ийнхүү анх удаа бүрэн өөрчлөх гэж байна.
Одоо гүйлгээнд байгаа дэвсгэртүүд дээр Европын түүхийн янз бүрийн үеийн уран барилгын хэв маягийг дүрсэлсэн байдаг. Харин 2024 онд багтаан дизайныг шинэчлэх шийдвэр гарсны дагуу ЕТБ одоогоор хоёр үндсэн концепцийг онцлоод байна.
Энэхүү үзэл баримтлалын хүрээнд дэвсгэрт бүр дээр байгалийн тогтоц болон жигүүртэн шувуудыг хослуулан дүрслэх юм.
10 евро: Хүрхрээ эсвэл тогтуун урсгалтай голыг номин шогшир (kingfisher) шувууны хамт дүрсэлж, арын талд нь Европын холбооны удирдах институтуудыг байршуулна.
50 евро: Голын мушгиа хөндий дээгүүр нисэж буй цагаан дэглийг дүрсэлж, ар талд нь Европын шүүхийн байгууламжуудыг зурах аж.
Хоёр дахь концепц нь Европын шинжлэх ухаан, урлаг, түүхийг өөрчилсөн гарамгай зүтгэлтнүүдийн хөрөгт зориулагджээ.
5 евро: Дуурийн домогт дуучин Мария Каллас.
10 евро: Алдарт хөгжмийн зохиолч Людвиг ван Бетховен.
100 евро: Сэргэн мандалтын үеийн суут ухаантан Леонардо да Винчи.
Ирэх сард дизайнерууд эцсийн хувилбаруудаа танилцуулж, сарын сүүлчээр ЕТБ ялагчийг зарлах тов гарчээ. Гэсэн хэдий ч шинэ дэвсгэртүүд гүйлгээнд гартал дахин хэдэн жилийн хугацаа шаардлагатай. Учир нь:
Мөнгөн тэмдэгт хэвлэх бэлтгэл ажил маш нарийн бөгөөд урт хугацаа авдаг.
Шинэ мөнгөн тэмдэгтийг хуучин дэвсгэрттэй зэрэгцүүлэн аажмаар нэвтрүүлнэ.
Сонирхуулахад: Шинэ загвар нь зөвхөн үзэмж бус, аюулгүй байдлын хамгийн сүүлийн үеийн элементүүдийг агуулсан байх юм.
СЭТГЭГДЭЛ БИЧИХ