Дэлхийн нефтийн зах зээлд сүүлийн өдрүүдэд Brent ба WTI маркийн газрын тосны үнэ 6.5 %–иар өссөн байна. Энэ өсөлт нь АНУ болон Ираны хооронд үүссэн дипломат болон геополитикийн хурцадмал байдалтай шууд холбогдож байгаа аж. Өнгөрсөн өдрүүдэд нефтийн үнэ гурван өдрийн турш дараалан нэмэгдэж, Brent маркийн нефть нэг баррель нь 72.34 ам.доллар, West Texas Intermediate (WTI) нь 67 ам.доллар-т хүрчээ. Энэ нь өмнөх өдрийн ханшаас ойролцоогоор 1 орчим хувиар өссөн үзүүлэлт юм.
АНУ болон Ираны хооронд үүсэж буй хурцадмал байдал, Гол Дорнод дахь зөрчил, гол нефтийн тээвэрлэлтийн маршрут дээрх аюул занал нь зах зээлд эрсдэлийг бий болгож байгаа нь үнийн өсөлтөд шууд нөлөөлж байна.
Үүнтэй холбоотойгоор Ормузын хоолойгоор дайран өнгөрдөг далайн тээвэр доголдох вий хэмээн хөрөнгө оруулагчид санаа зовниж байна. Ормуз бол дэлхий даяар хэрэглэж буй нефтийн 20 хувь дайран өнгөрдөг, Ираны хяналтад байдаг тэнгисийн хоолой юм. Энэ долоо хоногийн эхээр Ираны тал уг хоолойг хэдэн цагаар хааж, тэнгисийн цэргийн сургуулилалт хийжээ.
Гэвч олон улсын шинжээчид маргаантай байр суурьтай байна. Зарим нь геополитикийн эрсдэл тодорхойгүй хэвээр байвал үнэ өндөр хэвээр байх боломжтой гэж үздэг бол, зарим нь нийлүүлэлтийн нөхцөл сайжирч, хямрал намжвал үнэ буурч болно гэж таамаглаж байна.
СЭТГЭГДЭЛ БИЧИХ