Э.Батшугар НҮБ-ын Хүүхдийн сан-гийн Беате Дастел-ыг хүлээн авч уулзан, хамтын ажиллагааны үр дүн болон цаашдын чиглэлүүдийн талаар санал солилцлоо.
Уулзалтын эхэнд сайд Э.Батшугар шинээр томилогдсон суурин төлөөлөгч Беате Дастелд баяр хүргэж, ажлын амжилт хүслээ. Тэрбээр НҮБ-ын Хүүхдийн сан-тай олон жилийн турш үр дүнтэй, нягт хамтран ажиллаж ирсэнд талархал илэрхийлж, Монгол Улсын Засгийн газар болон эрүүл мэндийн салбарын бодлого, үйл ажиллагааг тууштай дэмжиж ирснийг онцлон тэмдэглэлээ.
Талууд уулзалтын үеэр өмнө хэрэгжүүлсэн төсөл, хөтөлбөрүүдийн үр дүнг дүгнэж, цаашдын хамтын ажиллагааг өргөжүүлэх талаар ярилцсан байна.
Цаашид орон нутгийн эрүүл мэндийн байгууллагуудын цэвэр ус, ариун цэврийн нөхцөлийг сайжруулах, салбарын цахим хөгжлийг дэмжих, эрүүл мэндийн даатгалын засаглалыг бэхжүүлэх, эмийн нэгдсэн худалдан авалтын тогтолцоог боловсронгуй болгоход хамтран ажиллахаар санал нэгдлээ.
Мөн хүүхэд, эхийн эрүүл мэндийг дэмжих, чанартай, хүртээмжтэй тусламж үйлчилгээг иргэн бүрд хүргэхийн төлөө хамтын ажиллагаагаа улам бэхжүүлэхээ талууд онцоллоо.
СЭТГЭГДЭЛ БИЧИХ