Сэлэнгэ аймгийн хэмжээнд сургууль, дотуур байр, цэцэрлэгийн хүүхдийн хоолны нэгдсэн жишиг цэс нэвтрүүлэхээр ажиллаж байна.
Аймгийн Боловсролын газраас хүүхдийн хоолны чанар, хүртээмжийг сайжруулах зорилгоор сургууль, дотуур байр, цэцэрлэгийн хоол зүйч, эмч, нярав, ахлах тогоочийн төлөөллийг оролцуулсан ажлын хэсгийг байгуулан, нэгдсэн цэсийг боловсруулаар хамтран ажиллаж байна.
Хүүхдийн хоолны нэгдсэн цэстэй болсноор нэлээд олон давуу талууд бүрдэнэ хэмээн үзэж байгаа юм.
Тодруулбал:
- Хүүхдийн нас, онцлогт тохирсон шим тэжээлийн зохистой хэрэгцээ хангагдана.
- Хоолны чанар, аюулгүй байдал сайжирна.
- Сургууль, цэцэрлэгүүдийн хоол үйлдвэрлэлд нэгдсэн стандарт мөрдөгдөнө.
- Түүхий эд, хүнсний бүтээгдэхүүний худалдан авалт оновчтой болж, зардлын үр ашиг нэмэгдэнэ.
- Хоолны нэр төрөл, хүртээмж нэмэгдэнэ.
- Хяналт, үнэлгээ хийх боломж сайжирна.
- Тогооч нарын ажлын ачаалал багасна гэх мэт.
Өнөөдрийн байдлаар сургууль, цэцэрлэг, дотуур байр бүр өөр өөрсдийн боломж, төсөв, ханган нийлүүлэлтэд тулгуурлан хоолны цэсээ гарган ажиллаж байгаа. Энэ нь хүүхдүүдийн авах шим тэжээлийн хэмжээ жигд бус, зарим тохиолдолд шаардлага хангахгүй байх эрсдэлтэй байгаа юм.
Мөн санхүүжилтийн ялгаа, гал тогооны тоног төхөөрөмж, хүний нөөц, хяналтын тогтолцоо сул зэрэг олон хүчин зүйлтэй холбоотой системийн асуудал хэмээн үзэж дээрх асуудлыг шийдвэрлэхээр ажиллаж байна.
СЭТГЭГДЭЛ БИЧИХ