Бээжин хотноо ням гарагт болсон хүн дүрст роботууд болон гүйлт сонирхогчдын хагас марафон гүйлтийн тэмцээний үеэр нэгэн робот дэлхийн дээд амжилтыг шинэчлэн тогтоосон нь Хятад улсын робот техникийн салбар хурдацтай хөгжиж буйг илтгэсэн үйл явдал боллоо. Тус тэмцээнд түрүүлсэн хүн дүрст робот замаа 50 минут 26 секундэд туулж барианд орсон байна.
Өнгөрсөн оны дөрөвдүгээр сард БНХАУ-ын нийслэл хотноо "дэлхийд анх удаа" зохион байгуулсан роботуудын хагас марафонд түрүүлсэн робот 2 цаг 40 минут 42 секундийн хугацаанд замаа дуусгаж байсантай харьцуулахад энэ удаад уг үзүүлэлтийг хол давжээ.
Уганда улсын тамирчин Жейкоб Киплимо энэ оны гуравдугаар сард Лиссабон хотноо болсон хагас марафонд 57 минут 20 секундийн амжилтаар дээд амжилт тогтоосон байна.
Өнгөрсөн оны тэмцээнд оролцогч багуудын тоо 20 байсан бол энэ онд 100 орчим болж нэмэгдсэн бөгөөд хүн дүрст роботууд автомат навигаци болон зайнаас удирдах горимоор уралдсан байна. Уралдааны эхэнд зарим багт техникийн хүндрэл гарч, хэд хэдэн робот тэнцвэр алдан унах тохиолдол гарчээ.
АНУ-тай техник технологийн хөгжлөөр өрсөлдөж буй БНХАУ хиймэл оюунд суурилсан хүн дүрст робот болон эрчим хүчний шинэ эх үүсвэр бүхий автомашин зэрэг дэвшилтэт технологийн бүтээгдэхүүний хөгжүүлэлтийг бүх талаар дэмжиж байна.
СЭТГЭГДЭЛ БИЧИХ