БНСУ-д энэ оны эхний улиралд ирсэн гадаадын жуулчдын тоо түүхэн дээд хэмжээнд хүрчээ. Өнгөрсөн сард Сөүл хотын төвд болсон К-попын супер од BTS хамтлагийн тоглолтыг үзэхээр дэлхийн өнцөг булан бүрээс олон мянган шүтэн бишрэгч нь хүрэлцэн ирсэн нь ийнхүү жуулчдын урсгал нэмэгдэхэд нөлөөлжээ.
Тус улсын Соёл, спорт, аялал жуулчлалын яамны урьдчилсан мэдээллээр, 1-3 дугаар сарын хооронд нийт 4.76 сая гадаадын жуулчин ирсэн нь 2025 оны мөн үеийнхээс 23 хувиар өссөн үзүүлэлт бөгөөд нэгдүгээр улиралд бүртгэгдсэн түүхэн дэх хамгийн өндөр үзүүлэлт болжээ.
Өмнөд Солонгост ирсэн жуулчдын тоогоор БНХАУ тэргүүлсэн бөгөөд 1.45 сая хүн аялсан нь өмнөх оныхоос 29 хувиар өссөн байна. Удаах байрт Япон улс орсон бөгөөд тус улсын 940 мянган жуулчин (20 хувиар өссөн) Өмнөд Солонгост аялжээ.
Орон нутгийн нисэх онгоцны буудлуудаар ирсэн жуулчдын тоо 50 шахам хувиар өсөж, 850 мянгад хүрсэн байна. Ингэснээр орон нутгийг зорих гадаадын жуулчдын эзлэх хувь 34.5 хувь болж нэмэгджээ.
Аяллын хөлөг онгоцны аялал мөн эрс сэргэж байгаа бөгөөд Чежү, Бусан, Инчон зэрэг томоохон боомтуудад аяллын хөлөг онгоцнууд 338 удаа ирж зогссон нь 2025 оны мөн үеийнхээс 52.9 хувиар нэмэгдсэн байна.
СЭТГЭГДЭЛ БИЧИХ