Аваргуудын лигийн тэмцээний шөвгийн наймын хариу тоглолтод Германы “Бавариа” багийн хөлбөмбөгчид Испанийн “Реал”-ыг 4:3 харьцаагаар хожсоноор хагас шигшээд шалгарлаа.
Мюнхен хотод болсон уг тоглолтод баваричуудаас Александар Павлович (6 дахь минут), Гарри Кейн (38), Луис Диас (89), Майкл Олисе (90+4) нар, “Реал”-аас Арда Гюлер (1, 29), Килиан Мбаппе (42) нар гоол оруулжээ. Тоглолтын 86 дахь минутанд хоёр дахь удаагаа шар хуудас авсан зочин багийн тоглогч Эдуардо Камавинга талбайгаас хөөгдсөн байна. Хоёр багийн эхний тоглолт Мадридад болж “Бавариа” 2:1 харьцаагаар хожсон билээ. Тус баг хагас шигшээд Францын "Пари Сен-Жермен"-тэй тоглох бөгөөд эхний тоглолт Парис хотод энэ сарын 28-нд, хариу тоглолт Мюнхенд 5 дугаар сарын 6-нд болно. Аваргуудын лигийн тэмцээний шөвгийн наймын өөр нэгэн хариу тоглолтод Английн “Арсенал” баг өөрийн талбайд Португалын “Спортинг” багтай 0:0 харьцаагаар хайнцсанаар хагас шигшээд шалгарлаа. Өнгөрсөн долоо хоногт Лиссабонд болсон эхний тоглолтод арсеналчууд 1:0 харьцаагаар хожсон юм.
Одоо хагас шигшээд Английн баг Испанийн “Атлетико”-той 29-ний өдөр Мадрид хотод эхний тоглолтоо хийх ба хариу тоглолт 5 дугаар сарын 5-нд Лондонд болно.Аваргуудын лигийн тэмцээний финалын тоглолт 5 дугаар сарын 30-нд Будапешт хотод болно.
СЭТГЭГДЭЛ БИЧИХ