Швейцарьчууд цагаачлалын асуудлаас болоод дотооддоо хуваагдалтай байгаа энэ үед барууны үзэлтэй Швейцарийн ардын нам хүн амын тоог 10 саяар хязгаарлах санал дэвшүүлжээ. Тус улсын хамгийн том улс төрийн бүлгэмийн дэвшүүлсэн энэ саналын дагуу санал хураалт явуулах аж. Яг одоо Швейцарь улс 9.1 сая хүн амтай байна.
Санал хураалтыг зургадугаар сарын 14-нд товложээ. Хэрвээ санал хураалтын дүнгээр хүн амын тоог 10 саяд хязгаарлах нь батлагдвал засгийн газар арга хэмжээ авч эхэлнэ. Ингэхдээ хүн амын тоог 9.5 сая хүрмэгц нь орогнол хүсэгчид болон гадаадын иргэдийн ар гэрийг нэвтрүүлэхээс татгалзах арга хэмжээ авах бололтой. Хэрвээ хүн амын тоо 10 сая хүрчихвэл засгийн газар Европын холбоотой байгуулсан чөлөөт хөдөлгөөний гэрээгээ хүчээр цуцлахаас өөр аргагүй болно.
Швейцарь улс Европын холбооны гишүүн биш. Гэхдээ Европын холбоо нь Швейцарийн хамгийн том худалдааны түншид тооцогддог. Талууд 120 гаруй хэлэлцээрээр дамжуулан нэгдмэл байдлаар үйл ажиллагаа явуулдаг бөгөөд энэ нь Швейцарь улсад Европын холбооны зах зээлд нэвтрэх, хүмүүс чөлөөтэй зорчих, худалдаа эрхлэх боломж олгодог. Хүн амын тоо хэт ихэссэнээс болж Швейцарь улсад төрийн үйлчилгээ авахад хүндрэлтэй болж, дэд бүтцэд ачаалал үүссэн, түрээсийн үнэ өссөн гэж Швейцарийн ардын нам мэдэгдэж байна. Швейцарийн засгийн газар Холбооны зөвлөл гэж нэрлэгддэг долоон гишүүнээс бүрддэг. Эндээс цор ганц нам хүн амын тоог хязгаарлахыг дэмжиж буй нь Швейцарийн ардын нам.
Хэдийгээр Холбооны зөвлөл дотроо ганцаараа боловч ард иргэд энэ саналыг дэмжих магадлалтай. Швейцарийн бүх нийтийн санал асуулгын системийн дагуу юун түрүүнд 18 сарын дотор санал хураалтыг дэмжиж буй 100 мянган иргэний гарын үсгийг цуглуулах ёстой. Үүний дараагийн алхам нь бүх нийтийн санал асуулга юм.
ЭХ СУРВАЛЖ: CNN
СЭТГЭГДЭЛ БИЧИХ