Төрийн өмчит ААН-д 8.4 их наяд төгрөгийн зөрчил илэрчээ

 

"Үндэсний аудитын газар"-ын Санхүүгийн аудитын газраас төрийн өмчит аж ахуйн нэгжүүдийн 2025 оны санхүүгийн тайланд хийсэн аудитын дүнг нэгтгэн, албан ёсны audit.mn цахим хуудсанд ил тод байршууллаа.

Тус аудитын дүнгээр нийт 8.4 их наяд төгрөгийн хэмжээтэй 648 зөрчил илэрсэн нь төрийн өмчит компаниудын санхүүгийн сахилга бат, хөрөнгийн зарцуулалтад ноцтой асуудал байгааг харуулж байна.

Аудитын тайлангаас харахад илэрсэн зөрчлүүдийг ангилбал:

• Төлбөрийн акт - 76 зөрчил, 612.9 сая төгрөг
• Албан шаардлага - 323 зөрчил, 5.9 их наяд төгрөг
• Зөвлөмж – 228 зөрчил, 2.4 их наяд төгрөг
• Хариуцлага тооцуулах албан шаардлага - 21 албан тушаалтанд ногдуулжээ

Эдгээр зөрчил нь голчлон төсвийн хөрөнгийг зориулалт бусаар ашиглах, санхүүгийн тайлангийн үнэн зөв байдлыг хангахгүй байх, өр авлагын бүртгэл зөрөх зэрэг нийтлэг асуудлуудтай холбоотой байгааг өмнөх аудитууд ч мөн адил онцолж байсан байна. 

Үндэсний аудитын байгууллага нь жил бүр төрийн болон төрийн өмчит байгууллагуудын санхүүгийн тайланд аудит хийж, илэрсэн зөрчил дутагдлыг олон нийтэд мэдээлснээр ил тод байдал, хариуцлагыг сайжруулах зорилготой ажилладаг.

Энэ удаагийн аудитын дүн нь төрийн өмчит аж ахуйн нэгжүүдийн засаглал, санхүүгийн хяналтыг сайжруулах шаардлага өндөр байгааг дахин харуулж байна.