ОХУ-ын эрх баригчид мессежийн WhatsApp платформыг “бүрэн хаах” оролдлого хийж байна хэмээн тус компанийн зүгээс пүрэв гарагт мэдэгдэв. Шүүмжлэгчдийн үзэж буйгаар хяналт, цензурын зорилготой байж болзошгүй ажээ.
Гэвч компани хандалтыг ямар аргаар хязгаарлаж буй болон үйлчилгээгээ хэвийн байлгахын тулд ямар арга хэмжээ авч буйгаа тодорхой мэдээлсэнгүй. WhatsApp нь ОХУ-д 100 сая гаруй хэрэглэгчтэй.
Кремлийн хэвлэлийн төлөөлөгч Дмитрий Песков уг мессежийн аппликейшнийг хааж байгааг баталжээ. Москва Таймс сонин WhatsApp-ын толгой компани болох Meta-аас тайлбар авахыг хүссэн байна. ОХУ-д амьдарч буй зарим хэрэглэгчид WhatsApp-д зөвхөн VPN ашиглан нэвтэрч байгаагаа мэдээлжээ. Зарим мэдээллийн сувгууд болох TV Rain болон Meduza нар WhatsApp-ын вебсайт Оросын үндэсний домэйн нэрийн систем (DNS)-ээс хасагдсан талаар мэдээлсэн байна. DNS-ээс хасагдсан тохиолдолд хэрэглэгчид VPN хэрэглэхгүй бол тухайн сайтыг нээх боломжгүй болдог байна.
Энэ долоо хоногт мөн YouTube, Facebook, Instagram болон The Moscow Times зэрэг сайтууд DNS жагсаалтаас хасагдсан байж болзошгүй мэдээлэл гарчээ. Орос улс 2022 онд Украинд халдан довтолсон талаарх мэдээлэл нийтэлснийх нь дараа The Moscow Times сайтын хандалтыг анх хааж байсан юм.
“Хуулийг мөрдөх асуудал яригдаж байна. Хэрэв Meta Оросын эрх баригчидтай хамтран ажиллаж, хуульд нийцвэл тодорхой тохиролцоонд хүрэх боломжтой” гэж Кремлийн хэвлэлийн төлөөлөгч Дмитрий Песков ярьжээ.
Эдгээр хязгаарлалт нь иргэдийг төрийн дэмжлэгтэй "Max" мессежийн аппликейшнийг татан ашиглахыг уриалж буй бодлоготой давхцаж байна. Зуны эхнээс хойш Кремлийг дэмжигч олон суваг "Max" апп руу аажмаар шилжиж эхэлсэн байна. Max 12 дугаар сард 70 сая идэвхтэй хэрэглэгчтэй болж, ОХУ-ын хамгийн өргөн хэрэглэгддэг гурав дахь аппликейшн болжээ. Гэсэн ч энэ нь 94.5 сая болон 93.6 сая идэвхтэй хэрэглэгчтэй WhatsApp, Telegram-ийн үзүүлэлтээс доогуур хэвээр байна.
WhatsApp болон Telegram-д тавигдсан хязгаарлалт нь ОХУ дахь дижитал орчны эрх чөлөө, мэдээллийн урсгал, хувийн нууцлалын асуудлыг дахин хурцаар тавьж байна. Эрх баригчид үүнийг “хууль хэрэгжилт” болон “залилангийн эсрэг арга хэмжээ” хэмээн тайлбарлаж байгаа бол компаниуд болон шүүмжлэгчид үүнийг хяналт, цензурыг нэмэгдүүлэх алхам гэж үзэж байна.
Цаашид Meta болон Оросын эрх баригчдын хооронд ямар тохиролцоо хийгдэх, эсвэл WhatsApp-ын хандалт бүрэн хаагдах эсэх нь ОХУ-ын 100 сая гаруй хэрэглэгчийн өдөр тутмын харилцаанд шууд нөлөөлөх асуудал болоод байна.
СЭТГЭГДЭЛ БИЧИХ